Թրամփը շատերին է արտաքսելու ԱՄՆ-ից․ փորձագետները նաև հայերի արտագաղթ են սպասում

ԱՄՆ միգրացիոն խստացված քաղաքականությունը կարող է ազդել նաև Ամերիկայում ապրող հայերի վրա՝ կարծում են փորձագետները։ Նրանք նկատում են, որ առաջնահերթ ուշադրությունը կուղղվի ԱՄՆ-Մեքսիկա սահմանով ԱՄՆ-ում հայտնված ապօրինի միգրանտներին։ Այդ հատվածում արտակարգ դրություն է հայտարարված, ԱՄՆ–ն Մեքսիկա ու Կոլումբիա է արտաքսում ապօրինի միգրանտներին։

Միացյալ Նահանգների միգրացիոն խստացված քաղաքականության պատճառով ԱՄՆ–ի և Կոլումբիայի միջև առևտրային պատերազմ է հայտարարվել։

Նախագահներ Դոնալդ Թրամփի ու Գուստավո Պետրոյի միջև լարվածության պատճառը անօրինական միգրանտների արտաքսումն է Միացյալ Նահանգներից։ Ամերիկյան երկու ինքնաթիռ Կալիֆոռնիայից Կոլումբիա է տեղափոխել մի խումբ անօրինական ներգաղթյալների։ Կոլումբիայի նախագահը, սակայն, թույլ չի տվել, որ դրանք վայրէջք կատարեն, ինչը բարկացրել է Թրամփին։ Վերջինը որոշել է Կոլումբիայից ներմուծվող բոլոր ապրանքների համար 25 տոկոս մաքսատուրք սահմանել։

Ավելի ուշ, սակայն, Սպիտակ տունը հայտնեց, որ Կոլումբիան պատրաստ է հետ ընդունել ԱՄՆ-ից արտաքսված միգրանտներին, այդպիսով մաքսատուրքերի կամ պատժամիջոցների թեման դուրս եկավ օրակարգից։

Աղբյուր: hy.armradio.am